ດື່ມນ້ຳເປັນປະຈຳເຮັດໃຫ້ຮ່າງກາຍແຂງແຮງ ແລະຮັກສາສຸຂະພາບໄດ້ດີ.

          ເຊື່ອວ່າທຸກໆຄົນຄົງຈະຮູ້ດີຢູ່ແລ້ວວ່າ ນ້ຳເປັນສ່ວນປະກອບສຳຄັນທີ່ຮ່າງກາຍຂາດບໍ່ໄດ້ ແຕ່ກໍ່ຍັງມີອີກຫຼາຍຄົນທີ່ບໍ່ມັກດື່ມນ້ຳ ເພາະບາງຄົນກໍຢ້ານວ່າຖ້າດື່ມນ້ຳເລື້ອຍໆ ມັກເຮັດໃຫ້ທຽວເຂົ້າຫ້ອງນ້ຳດຸ ຫຼືຫຼາຍໆເຫດຜົນຕ່າງໆ ນາໆ ແຕ່ບອກໄດ້ເລີຍວ່າການທີ່ເຈົ້າບໍ່ດື່ມນ້ຳ ເຮັດໃຫ້ເຈົ້າພາດປະໂຫຍດຫຼາຍໆຢ່າງທີ່ອັດສະຈັນ ເຊິ່ງວ່າຄຸນປະໂຫຍດຈະມີຫຍັງແນ່ນັ້ນເຮົາມາອ່ານເບິ່ງນຳກັນເລີຍ:

1. ການດື່ມນ້ຳຊ່ວຍໃຫ້ຫຼຸດອາການອ່ອນເພຍ

ສາເຫດສຳຄັນຢ່າງໜຶ່ງທີ່ເຮັດໃຫ້ອາການອ່ອນເພຍ ກໍ່ຄືພາວະຂາດນ້ຳ ດັ່ງນັ້ນການດື່ມນ້ຳຈະເຮັດໃຫ້ຮ່າງກາຍພາຍໃນຊຸ່ມຊື່ນ ແລະຫຼຸດພາວະຂາດນ້ຳໄດ້ ຊ່ວຍໃຫ້ຮູ້ສຶກສົດຊື່ນຫຼາຍຂຶ້ນກວ່າເກົ່າ ໃຜທີ່ກຳລັງຮູ້ສຶກອ່ອນເພຍ ລອງດື່ມນ້ຳເບິ່ງ ຮັບຮອງວ່າຊ່ວຍໄດ້ແນ່ນອນ.

2. ຊ່ວຍໃຫ້ການຫຼຸດນ້ຳໜັກໄດ້ຜົນດີຂຶ້ນ.

ການດື່ມນ້ຳກ່ອນກິນອາຫານ ຈະຊ່ວຍເຮັດໃຫ້ເຈົ້າຮູ້ສຶກອີ່ມທ້ອງ ແລະກິນອາຫານໄດ້ໜ້ອຍລົງ ລົງທັງຖ້າຫາກດື່ມນ້ຳຂະນະທີ່ກຳລັງຫິວ ນ້ຳກໍຈະຊ່ວຍຫຼຸດອາການຫິວເຂົ້າໄດ້ເປັນຢ່າງດີ ບໍ່ພຽງແຕ່ເທົ່ານັ້ນ ແຕ່ການດື່ມນ້ຳຍັງຊ່ວຍເພີ່ມການເຮັດວຽກຂອງລະບົບການເຜົາຜານອີກດ້ວຍໂດຍສະເພາະນ້ຳເຢັນ ສາມາດຊ່ວຍໃຫ້ຮ່າງກາຍເຜົາຜານໄຂມັນໄດ້ຫຼາຍຂຶ້ນ.

3. ກຳຈັດສານພິດໃນຮ່າງກາຍ.

ໄຕເປັນອະໄວຍະວະທີ່ສຳຄັນໃນການຂັບສານພິດອອກຈາກຮ່າງກາຍ ໂດຍເມື່ອໄຕກອງສານພິດໃນຂອງແຫຼວທີ່ຢູ່ໃນຮ່າງກາຍ ແລ້ວກໍຈະຖືກຂັບອອກມາໃນຮູບແບບຕ່າງໆ ເຊັ່ນ: ເຫື່ອ, ຍ່ຽວ ການດື່ມນ້ຳຈະຊ່ວຍໃຫ້ຮ່າງກາຍຂັບສານພິດອອກມາໄດ້ດີຂຶ້ນ ຊ່ວຍຫຼຸດຄວາມສ່ຽງການເກີດການຕິດເຊື້ອ ໃນທໍ່ຍ່ຽວ ແລະໜິ້ວໃນໄຕໄດ້.

4. ບຳລຸງຜິວພັນ

ຖ້າຢາກມີຜິວພັນທີ່ດີ ແລະເບິ່ງຄືມີນ້ຳມີນວນ ຂໍແນະນຳໃຫ້ດື່ມນ້ຳເລີຍ ເພາະນ້ຳຈະຊ່ວຍຂັບເອົາສານພິດຕ່າງໆ ອອກຈາກຮ່າງກາຍ ເຮັດໃຫ້ຜິວພັນດີຂຶ້ນ ແຖມຍັງຊ່ວຍໃຫ້ຜິວພັນໜຸ່ມຂຶ້ນກວ່າເກົ່າ.

5. ຮັກສາອາການເຈັບໄດ້.

ອາການໄມເກນ ແລະປວດຫຼັງ ແທ້ຈິງແລ້ວອາດຈະມີສາເຫດຈາກພາວະຂາດນ້ຳ ໃນຮ່າງກາຍໄດ້ ດັ່ງນັ້ນການດື່ມນ້ຳຢ່າງພຽງພໍ ຈະສາມາດຊ່ວຍຫຼຸດອາການເຫຼົ່ານີ້ໄດ້ເປັນຢ່າງດີ ຖ້າບໍໍ່ເຊື່ອລອງດື່ມນ້ຳຫຼາຍໆ ເວລາເຈັບຫົວລອງເບິ່ງ ເຈົ້າຈະຮູ້ສຶກເລີຍວ່າ ອາການເຈັບຫົວຈະເບົາລົງ.

6. ປ້ອງກັນໂລກມະເລັງ.

ມີການສຶກສາໜຶ່ງພົບວ່າການດື່ມນ້ຳຫຼາຍໆ ຈະຊ່ວຍຫຼຸດການເກີດໂລກມະເລັງທຳປັດສະວະ ເພາະການດື່ມນ້ຳຫຼາຍໆ ຈະເຮັດໃຫ້ຍ່ຽວດຸຂຶ້ນ ເຊິ່ງການທີ່ເຮົາເບົາເລື້ຶຶອຍໆນັ້ນ ຈະຊ່ວຍຫຼຸກການກໍ່ໂຕຂອງມະເລັງໃນກະເພາະປັດສະວະໄດ້ ນອກຈາກນີ້ການດື່ມນ້ຳຢ່າງພຽງພໍ ບໍ່ໃຫ້ຮ່າງກາຍ ເກີດພາວະຂາດນ້ຳຍັງຊ່ວຍຫຼຸດການເກີດມະເລັງລຳໄສ້ໃຫຍ່ ແລະມະເລັງເຕົ້ານົມອີກດ້ວຍ.

7. ປ້ອງກັນຕະຄິວ ແລະອາການເຄັດ

ພາວະຂາດນ້ຳສົ່ງຜົນໃຫ້ຄວາມຍືດຍຸນ ຂອງກ້າມເນື້ອ ແລະສານຫຼໍ່ລື່ນ ລະຫວ່າງຂໍ້ຕໍ່ຕ່າງໆ ຫຼຸດໜ້ອຍລົງ ຈົນອາດເຮັດໃຫ້ເກີດອາການບາດເຈັບໄດ້ງ່າຍ ດັ່ງນັ້ນ ການດື່ມນ້ຳຈຶ່ງຈຳເປັນຕໍ່ກ້າມເນື້ອ ແລະຂໍ້ຕໍ່ຕ່າງໆ ຖ້າບໍ່ຢາກເປັນຕະຄິວ ຫຼືເຄັດຂັດຕາມຂໍ້ຕ່າງໆ ຄວນໝັ່ນດື່ມນ້ຳໃຫ້ພຽງພໍຢູ່ສະເໝີກ

8. ຊ່ວຍເຮັດໃຫ້ອາລົມດີ

ຫຼາຍຄົນອາດຈະແປກໃຈວ່າ ການດື່ມນ້ຳຊ່ວຍໃຫ້ອາລົມດີແທ້ຫວາ ຂໍບອກໄດ້ເລີຍວ່າສາມາດຊ່ວຍໃຫ້ອາລົມດີໄດ້ແທ້ ເພາະເມື່ອເຮົາດື່ມນ້ຳເຂົ້າໄປໃນປະລິມານທີ່ພຽງພໍຕໍ່ຮ່າງກາຍແລ້ວ ກໍຈະຊ່ວຍໃຫ້ລະບົບເຮັດວຽກຕ່າງໆ ພາຍໃນຮ່າງກາຍ ເຮັດວຽກໄດ້ເປັນປົກກະຕິ ລືມໄປໄດ້ເລີຍກັບອາການຜິດຜົກກະຕິຕ່າງໆ ທີ່ຈະສົ່ງຜົນກະທົບຕໍ່ຈິດໃຈ.

9. ຊ່ວຍໃຫ້ລະບົບຂັບຖ່າຍເຮັດວຽກໄດ້ດີຂຶ້ນ.

ການດື່ມນ້ຳຈະຊ່ວຍລະລາຍໄຂມັນໃນຮ່າງກາຍ ແລະຊ່ວຍໃຫ້ໄຟເບີຊະນິດທີ່ລະລາຍໃນນ້ຳໄດ້ນັ້ນເຮັດວຽກໄດ້ເຕັມທີ່ ສົ່ງຜົນໃຫ້ ອາການທ້ອງຜຸລົດລົງ ການດື່ມນ້ຳຫຼາຍໆ ຈະຊ່ວຍໃຫ້ຮ່າງກາຍຂັບຖ່າຍຂອງເສຍ ອອກມາໄດ້ງ່າຍ ແຕ່ຖ້າດື່ມນ້ຳໜ້ອຍເກີນໄປ ກໍຈະເຮັດໃຫ້ຮ່າງກາຍຕ້ອງການນ້ຳໄປໃຊ້ໃນສ່ວນອື່ນຈົນເຮັດໃຫ້ຂັບຖ່າຍໄດ້ຍາກ.

10. ດີຕໍ່ສຸຂະພາບ.

ມີການສຶກສາພົົບວ່າປະລິມານນ້ຳທີ່ດື່ມນັ້ນ ເຊື່ອມໂຍງກັບຄວາມສ່ຽງໂລກຫົວໃຈ ແລະຫຼອດເລືອດໂດຍການສຶກສາໄດ້ສະແດງໃຫ້ເຫັນວ່າ ການດື່ມນ້ຳຫຼາຍຂຶ້ນຈະເຮັດໃຫ້ຄວາມສ່ຽງໂລກຫົວໃຈຫຼຸດລົງ ແຕ່ການດື່່ມເຄື່ອງດື່ມທີ່ມີພະລັງງານສູງ ເຊັ່ນວ່າ: ໂສດາ ຫຼື ນ້ຳໝາກໄມ້ ຈະເຮັດໃຫ້ຄວາມສ່ຽງໃນການເສີຍຊີວິດດ້ວຍໂລກຫົວໃຈສູງຂຶ້ນ.

11. ຊ່ວຍຕໍ່ສູ້ກັບອາການປ່ວຍ.

ການດື່ມນ້ຳສາມາດຊ່ວຍຫຼຸດອາການຕັນດັງ ແລະພາວະຂາດນ້ຳໃນລະຫວ່າງທີ່ປ່ວຍເປັນໄຂ້ຫວັດໄດ້ ເຖິງວ່າຈະບໍ່ມີການສຶກສາໃດຢືນຢັນຢ່າງຊັດເຈນວ່າການດື່ມນ້ຳສາດຮັກສາໄຂ້ຫວັດໄດ້ ແຕ່ເຮົາກໍຄວນທີ່ຈະດື່ມນ້ຳໃນປະລິມານທີ່ເໝາະສົມ.

12. ເສີມສ້າງໃຫ້ສະໝອງເຮັດວຽກດີຂຶ້ນ.

ການສຶກສາໃນເມືອງລອນດອນ ປະເທດອັງກິດ ພົບວ່ານັກສຶກສາທີ່ນຳເອົານ້ຳເຂົ້າໄປໃນຫ້ອງເສັງ ຈະເສັງໄດ້ດີກວ່າ ນັ້ນກໍ່ເປັນຍ້ອນວ່າ ນ້ຳຈະຊ່ວຍເຮັດໃຫ້ສະໝອງປອດໂປ່ງ ສົ່ງຜົນຕໍ່ການເຮັດວຽກຕ່າງໆ ບໍ່ວ່າຈະໃນເລື່ອງຂອງຄວາມຈື່ຈຳ ຫຼືການຄິດປະມວນຜົນຕ່າງໆ.

13. ຊ່ວຍປັບຄວາມສົມດຸນຂອງອຸນຫະພູມໃນຮ່າງກາຍ ຂະນະທີ່ອອກກຳລັງກາຍ.

ການອອກກຳລັງກາຍເຮັດໃຫ້ຮ່າງກາຍມີອຸນຫະພູມທີ່ສູງຂຶ້ນ ແລະການດື່ມນ້ຳຂະນະທີ່ອອກກຳລັງກາຍຈະຊ່ວຍໃຫ້ອຸນຫະພູມໃນຮ່າງກາຍຫຼຸດລົງໄດ້ ແລະຊ່ວຍທົດແທນຂອງແຫຼວໃນຮ່າງກາຍທີ່ເສຍໄປຈາກການຂັບເຫງື່ອ.

14. ຫຼຸດຜ່ອນອາການເມົາຄ້າງ.

ການດື່ມແອລກໍຮໍ ເປັນສາເຫດສຳຄັນທີ່ເຮັດໃຫ້ເກີດພາວະຂາດນ້ຳ ແລະເຮັດໃຫ້ເກີດອາການເມົາຄ້າງ ການດື່ມນ້ຳ 1 ແກ້ວຫຼັງຈາກທີ່ທ່ານກິນແອລກໍຮໍ ຈະຊ່ວຍຫຼຸດພາວະຂາດນ້ຳໄດ້ອີກທາງໜຶ່ງ ແຖມຍັງຊ່ວຍໃຫ້ອາການເມົາຄ້າງຈາກການດື່ມແອລກໍຮໍອີກດ້ວຍ.

15. ປະຢັດເງິນ.

ຖືກຕ້ອງທີ່ສຸດ! ນ້ຳດື່ມເປັນເຄື່ອງດື່ມທີ່ຖືກທີ່ສຸດ ແລະເຮັດໃຫ້ເຮົາສົດຊື່ນໄດ້ດ້ວຍນ້ຳດື່ມພຽງແກ້ວດຽວ ຍິ່ງຖ້າເປັນນ້ຳດື່ມເຢັນໆແລ້ວ ຈະໄດ້ລືມໄປເລີຍວ່າເຄີຍດື່ມນ້ຳອັດລົມ ຫຼືກາເຟເຢັນພວກນັ້ນ.