ກິນຜັກຕ່ຳສຸດມື້ລະ 400 ກຣາມ ດີຕໍ່ຮ່າງກາຍ

ເມື່ອຂຶ້ນຊື່ວ່າ ຜັກ ແລ້ວ ຫຼາຍໆຄົນຄົງເຮັດໃຈຍາກທີ່ຈະຮັບປະທານ ເຖິ່ງແມ່ນວ່າຜັກນັ້ນມີປະໂຫຍດກັບຮ່າງກາຍຫຼາຍສ່ຳໃດ ແຕ່ກໍ່ຍັງຢາກເລືອກອາຫານປະເພດອື່ນເພື່ອເສີມສຸຂະພາບ ໃຫ້ຮ່າງກາຍຫຼາຍກວ່າ ຫຼື ບາງຄົນທີ່ກິນຜັກເປັນຊີວິດຈິດໃຈ ແຕ່ຍັງພົບວ່າຕົວເອງເຈັບປ່ວຍ ຫຼື ມີໂລກໄພຖາມຫາຢູ່ປະຈຳ ນັ້ນອາດຈະເປັນເພາະວ່າເຈົ້າໄດ້ຮັບປະລິມານບໍ່ພຽງພໍໃນແຕ່ລະມື້.

ກິນຜັກແບບໃດໃຫ້ໄດ້ປະໂຫຍດຫຼາຍທີ່ສຸດ?

ວີທີ ທີ່ເຮັດໃຫ້ໄດ້ຜົນປະໂຫຍດຫຼາຍທີ່ສຸດ ແມ່ນ ມື້ຕ້ອງກິນໃນປະລິມານ 400 ກຣາມ ຕໍ່ມື້ ອົງການອານາໄມໂລກ (WHO) ໄດ້ອອກຄຳແນະນຳໃຫ້ກິນຜັກ ແລະໝາກໄມ້ໃຫ້ໄດ້ຢ່າງໜ້ອຍ 400 ກຣາມ ຕໍ່ຄົນຕໍ່ມື້ ເພື່ອຫຼຸດຄວາມສ່ຽງຕໍ່ການເປັນໂລກຕ່າງໆ.

1. ຈະຊ່ວຍຫຸດຄວາມສ່ຽງໃນການເກີດໂລກມະເຮັງ ໄດ້ຫຼາຍເຖິງ 50 %
2. ຊ່ວຍຫຼຸດຄວາມສ່ຽງຂອງໂລກຫົວໃຈ
3. ຊ່ວຍຫຼຸດຄວາມສ່ຽງຂອງໂລກຫຼອດເລືອດສະໝອງ
4. ຫຼຸດຜ່ອນການເປັນເບົາຫວານ ແລະຄວາມດັນ
5. ຊ່ວຍຄວບຄຸມ ແລະຫຼຸດນ້ຳໜັກ

ແຕ່!!! ຈະຮູ້ໄດ້ຈັ່ງໃດວ່າເຮົາກິນເຖິງ 400 ກຣາມຫຼືບໍ່? ທ່ານສາມາດກະໄດ້ຈາກການເຮັດອາຫານກິນເອງຢູ່ທີ່ບ້ານ ໂດຍການກະຈາກການມືເຮົາເອງກໍ່ໄດ້ ເຊິ່ງ 400 ກຣາມກໍ່ຈະປະມານ 5-6 ໂອ້ງມື.

ກິນຜັກ ແລະໝາກໄມ້ ມີຄວາມຈຳເປັນຫຼາຍສ່ຳໃດ

          ໂດຍປົກກະຕິແລ້ວ ໃນ 1 ມື້ເຮົາຄວນໄດ້ຮັບສານອາຫານຄົບທັງ 5 ໝູ່ ເພາະແຕ່ລະໝູ່ຈະມີຄຸນສົມບັດ ແລະໃຫ້ປະໂຫຍດ ຈາກສານອາຫານແຕກຕ່າງກັນໄປ ໂດຍສະເພາະຜັກ ແລະ ໝາກໄມ້ນັ້ນອຸດົມໄປດ້ວຍສານອາຫານ ທີ່ມີປະໂຫຍດຕໍ່ຮ່າງກາຍ ແລະບໍ່ສາມາດທົດແທນໄດ້ຈາກອາຫານປະເພດອື່ນໄດ້ເຊັ່ນ:

• ອຸດົມໄປດ້ວຍວິຕາມິນ ແຮ່ທາດ ໃຍອາຫານ ແລະສານຕ້ານທານອານຸມູນອິດສະຫຼະ ຊ່ວຍໃຫ້ລະບົບການເຮັດວຽກຂອງຮ່າງກາຍ ເປັນປົກກະຕິ ຫຼືຄວາມສົມດຸນໃນການຄວບຄຸມການເຮັດວຽກ ແລະຊ່ວຍຄອບຄຸມການໄຫຼວຽນຂອງ ຂອງແຫຼວໃນຮ່າງກາຍເຊັ່ນວ່າ:
• ເບຕ້າ ແຄໂຣທີນ ວິຕາມິນເອ ສານອາຫານໃນໝວດຂອງສານຕ້ານອານຸມູນອິດສະຫຼະ ຊ່ວຍຕໍ່ຕ້ານອານຸມູນອິດສະຫຼະ ຫຼຸດຜ່ອນການເຖົ້າໄວ ແລະບຳລຸງສາຍຕາ.
• ອຸດົມໄປດ້ວຍວິຕາມິນຊີ ຊ່ວຍບຳລຸງຜິວໃຫ້ມີຄວາມຊູ່ມຊື່ນ ເປັງປັງ ບໍ່ມັກເຈັບປ່ວຍ ແລະບາດແຜເຊົາໄວ
• ໃຍອາຫານຊ່ວຍໃນການຂັບຖ່າຍ ແລະເສີມສ້າງລະບົບຍ່ອຍອາຫານດີຂຶ້ນ.

ຈະເກີດຫຍັງຖ້າວ່າບໍ່ເຄີຍກິນຜັກເລີຍ ຄວາມຈິງແລ້ວກໍ່ຂຶ້ນຢູ່ກັບສະພາບຮ່າງກາຍຂອງແຕ່ລະຄົນ ຖ້າບໍ່ກິນຜັກເລີຍແຕ່ສາມາດກິນອາຫານປະເພດອື່ນແທນ ຫຼືເສີມວິຕາມິນໃນສ່ວນທີ່ໂຕເອງຂາດໄດ້ ກໍ່ເປັນເລື່ອງທີ່ດີ ແຕ່ອາດຈະຕ້ອງກິນຫຼາຍຊະນິດ ຫຼາຍກວ່າກິນຜັກພຽງຊະນິດດຽວ ເຊິ່ງອາດຈະຫາກິນໄດ້ຍາກກວ່າ ດັ່ງນັ້ນ, ຈະຊ່ວຍໃຫ້ເຮົາສາມາດກິນຜັກໄດ້ງ່າຍຂຶ້ນ ລອງໃຊ້ໄອເດຍ ປຸງແຕ່ງຜັກໃຫ້ແຊບ ແລະກິນໄດ້ງ່າຍຂຶ້ນດ້ວຍວິທີຕໍ່ໄປນີ້:

ໄອເດຍໃນການປຸງແຕ່ງຜັກເຮັດໃຫ້ເຮົາຢາກກິີນ

1. ຖ້າຮູ້ສຶກວ່າຜັກຂົມກໍ່ຕ້ອງຕື່ມລົດຫວານ

ໃນຂັ້ນຕອນທຳອິດສຳລັບຄົນກິນຜັກໜ້ອຍ ຫຼືບໍ່ໄດ້ກິນເລີຍ ເນື່ອງຈາກຮູ້ສຶກວ່າລົດຊາດບໍ່ພຶງປະສົງປານໃດ ໃຫ້ລອງປະສົມກັບຂອງຫວານໂດຍການປຸງແຕ່ງ ເພີ່ມລົງໃນອາຫານປະເພດດຽວກັນ ເຊິ່ງເຮົາອາດຈະຫາຜັກທີ່ຫວານມາປຸງແຕ່ງກັບຜັກທີ່ຂົມເພື່ອໃຫ້ຕັດກັນແລ້ວກໍ່ສາມາດກິນໄດ້ງ່າຍ.

2. ລອງເຮັດເມນູຜັດທອດ

ເມນູທີ່ດີ ທີ່ກິນໄດ້ທັງເດັກນ້ອຍ ແລະຜູ້ໃຫຍ່ ຄືການເຮັດຜັດທອດນາໆຊະນິດ ອາດຈະເພີ່ມຄຸນຄ່າດ້ວຍການເຕີມໄຂ່ລົງໄປ ປະສົມກັບແປ້ງກໍ່ຈະໄດ້ຜັກທອດທີ່ກອບ ແລະອຸດົມໄປດ້ວຍໂປຣຕີນ ຫຼືຖ້າໃຜມັກກິນເຜັດ ກໍ່ສາມາດເພີ່ມເມນູແຈ່ວມາກິນຄຸ່ກັນໄດ້ ນອກຈາກນີ້ການຂົ້ວຜັກ ຫຼືຜັດຜັກຍັງເໝາະກັບການຫັດໃຫ້ເດັກນ້ອຍຫັນມາກິນຜັກ. ແຕ່ເຖິງຢ່າງໃດກໍຕາມ ເມນູຂົ້ວຜັກ ຫຼືຜັດຜັກ ອາດຈະບໍ່ເໝາະສົມກັບຄົນທີ່ກຳລັງລົດນ້ຳໜັກຢູ່ ເພາະນ້ຳມັນໃນຜັກທອດ ອາດເພີ່ມແຄລໍລີ່ໃຫ້ກັບທ່ານ.

3. ຖ້າຄິດວ່າຜັກສີຂຽວບໍ່ເປັນຕາກິນ ກໍ່ໃຫ້ລອງຜັກສີອື່ນແທນ ກໍ່ໄດ້ຄຸນປະໂຫຍດເຊັ່ນດຽວກັນ

ຕ່າງສີກໍ່ຕ່າງຄຸນຄ່າ ຮູ້ບໍ່ວ່າຜັກແຕ່ລະສີໃຫ້ປະໂຫຍດແຕກຕ່າງກັນອອກໄປ ຖ້າບໍ່ມັກໜ້າຕາຂອງຜັກໃບຂຽວ ທ່ານຍັງສາມາດກິນຈາກສີອື່ນໆໄດ້.

ຜັກສີແດງ ມີໄລໂຄປິນສູງ ມີສ່ວນຊ່ວຍໃນການບຳລຸງສຸຂະພາບຂອງຫົວໃຈ ປອດ ລວມເຖິງຕ່ອມລູກໝາກຂອງຜູ້ຊາຍ.

ຜັກສີຂຽວ ມີລູທີນ ຊີແຊນທີນ ທີ່ຊ່ວຍບຳລຸງສາຍຕາ ລວມເຖິງຍັງມີວິຕາມິນເຄ ເຊິ່ງກ່ຽວຂ້ອງກັບການແຂັງໂຕຂອງເລືອດ

ຜັກສີຂາວ ເຊັ່ນຫອມບົ່ວໃຫຍ່ ຫົວໄຊທ້າວ ມີເຄວເວທີນສູງ ຊ່ວຍບຳລຸງສຸຂະພາບ ກະດູກ ແລະຂໍ້ຕໍ່ຕ່າງໆ.

ຜັກສີມ່ວງ ອຸດົມໄປດ້ວຍສານແອນໂທໄຊຍານິນ ດີຕໍ່ສະໝອງແລະຫົວໃຈ

ຜັກສີສົ້ມ ມີເບຕ້າແຄໂຣທີນສູງ ຊ່ວຍບຳລຸງສາຍຕາ ລວມເຖິງຍັງຊ່ວຍໃຫ້ທ່ານມີສຸຂະພາບຂອງຫົວໃຈດີອີກດ້ວຍ.

4. ດື່ມນ້ຳຜັກ ແລະໝາກໄມ້ ໄດ້ຄຸນຄ່າສູງບໍ່ແພ້ກັນ.

          ອີກ 1 ວິທີທີ່ໃຊ້ໄດ້ຜົນສຳລັບຄົນທີ່ບໍ່ກິນຜັກ ກໍ່ໃຫ້ແປງເປັນນ້ຳປັ່ນ ອາດຈະເຕີມໝາກໄມ້ຕ່າງໆເພື່ອເພີ່ມລົດຊາດ ແລະເພື່ອໃຫ້ໄດ້ຄຸນປະໂຫຍດ ທີ່ຄົບຖ້ວນ ຄວນດື່ມກາກເຂົ້າໄປດ້ວຍ ໂດຍຄວນປັ່ນໃຫ້ພໍໃນ 1 ມື້ເທົ່ານັ້ນ.

ສັ່ງຊື້ສິນຄ້າໄດ້ທີ່: ຜັກ